Jaktfelt:

Felt A:
Den austlege delen av statsallmenningen med Veodalen, Smådalen, Sålell og Tesse-området. Grensar opp mot Langmorkje allmenning i Vågå. Tilkomst til området med bomvegar frå rv. 51 ved Randsverk og veg mot Brimi fjellstugu, eller frå rv. 15 i Garmo og ved Graffer.

Felt B:
Den vestlege delen med Visdalen, Leirdalen, Bøverdalen og Sognefjellet. Tilkomst til området direkte frå rv. 55 som går igjennom allmenningen, og med bomvegar frå denne innover Visdalen, Leirdalen, Bøverdalen og Høydalen.

Felt C:

Områda nord og vest for Gjende. Til dette feltet er det ikkje vegtilknyting. Lettaste tilkomsten er med båt over Gjende, men denne sluttar til vanleg rundt midten av september.

Jakttider:

Rype:

Jakt med hund er tillate i tida 15.9. - 23.12, for utanbygds frå 15.9 - 28.9.   Jakt utan hund er tillate i tida 15.9. - 28(29).2.

Skogsfugl:

Jakt med og utan hund: 15.9. - 23.12.

Hare:

Jakt med hund: 11.10. - 23.12.  Jakt utan hund: 15.9. - 28(29).2.

Andre småviltarter som det i forskrift frå DN er gjeve høve til å jakte på i området:

Jaktstart den 15.9. - til den dato som DN har fastsett som jakttid i området.

Jakt med hund.

For utanbygdsbuande med hund er jakta delt på to periodar, 15.-21.9. og 22.-28.9.  Det er ein kvote på 20 kort i kvar av periodane. Søknadsfrist for å søkje om jakt i ein av desse periodane er den 1. april kvart år. Jegerar som jaktar i lag, bør søkje samla. Namn på alle jegerane må framgå av søknaden. Hugs å prioritere jaktfelt. Søkjarane vil bli orienterte om resultatet av trekkinga i fyrstninga av mai månad.

Elektronisk søknadsskjema for jakt med hund finn du HER.

 Jakt utan hund.

Jakt utan hund er jamstelt for innanbygds og utanbygds jegerar.  Fjellstyret skal i forvaltninga "påse at det er en rimeleg fordeling mellom innenbygdsboende og utenbygdsboende jegere/jaktlag".  Frå jaktsesongen 09/10 vart også denne jakta kvoteregulert den fyrste halve månaden av jakta med bakgrunn i dei dårlege bestandsutsiktene og det aukande jakttrykket dei siste åra.  Jakta vert frå 2010 inndelt i to periodar, 15.-21.9 og 22.-28.9.  Frå 29.9 kan ein fritt kjøpe dags-, vekes- eller sesongkort.

Rypetaksering.

I samarbeid med fuglehundklubben gjennomfører fjellstyret ei taksering av lirypebestanden på tre felt i allmenningen kvart år i slutten av august.  Takseringa vert kjørt to gongar på kvart felt.  Med bakgrunn i takseringa kan det bli sett ein dagskvote.

Fyrstegongsjegerar og jegerar under opplæring.

Småviltjegarar som er under 16 år og under opplæring, og jaktar saman med tilsynsperson, slepp å løyse jaktkort. Tilsynsperson må ha gyldig jaktkort. Fyrstegongsjegerar får gratis jaktkort for småviltjakt. Dette må dokumenterast med bevis for avlagt jegereksamen. Kan ikkje dette leggjast fram, vil kortseljaren avvise kravet om gratis kort, og be jegeren leggje fram dokumentasjon for fjelloppsynet og fremje krav om refusjon for kortet. Fjellstyret oppmodar fyrstegongsjegerar om å jakte saman med ein erfaren jeger dei fyrste jaktturane.

Forskrift og jakt, fangst og fiske i statsallmenning finn du her.