Fjellstyret forvaltar, etter Fjellova, bruksrettane til seter og beite, samt jakt, fangst og fiske i statsallmenningar. bruksretten til skogsvirke blir forvalta av allmenningsstyret. Statskog har forvaltningsansvar som grunneigar, og tek avgjerder i grunndisponeringstiltak.

Dei fleste sakene knytt til bruksrett og eigedomsrett, vert gjort i samråd og gjennom samarbeid mellom fjellstyret og Statskog.

Lom fjellstyre forvaltar bruksrettane i Vår-, Leir- og Bøverdalen statsallmenning. I tillegg ligg 95% av Finndalen statsallmenning i Lom. Den har sitt eige styre samansett av representanter frå både Lom, Skjåk og Vågå kommunar. Smådalen er privateigd grunn, men bruksrettane vert forvalta som i statsallmenning. Med unntak av Smådalsvatna, inngår arealet i jakt- og fiskekortordningane for statsallmenningane.

I Vår-, Leir- og Bøverdalen statsallmenning er det totalt 113 setre registrert i seterregisteret pr januar 2010. I tillegg er det mange festekontrakter som gjeld dyrkingsjord og kulturbeite. Fjellstyret skal føre jamnleg kontroll av om utviste setre er i bruk. Slik kontroll skal skje kvart 10.år, og Statskog treng dokumentasjon på at dette er gjort, for å oppdatere seterregisteret.

I Jotunheimen er det tamreindrift. Lom fjellstyre leiger ut beite til tamreindrifta. Total inntekt av dette var i 2009 kr 404 260,-, og antal dyr på vinterbeite er årleg rundt 2350 dyr.