Fjellstyret har sju hytter. I delar av året er nokre av desse brukte fast av oppsynsmannskapet og av fegjetarane. Dette gjeld i beitesesongen for Heranosbua, Gjendebua og Veslfjellbua, og i enkelte periodar Grønbua og Langvassbua. Elles er alle hyttene til utleige.

Hyttene er låst, og leige må avtalast med fjelloppsynet. Innanbygdsbuande har fyrsteretten til leige. Ingen av hyttene har elektrisk strøm. Alle hyttene har vedfyring, og ved og gass inngår i leiga. Hyttene er bra utstyrt med kjøkenutstyr. Leigeprisen ligg i området 200-450 kr. per døgn, varierande med storleiken/standarden på hytta, og om leigetakaren er innanbygds eller utanbygds.

I tillegg til hyttene er det fire steinbuer som er restaurerte og står opne til allment bruk.

Bøvertjønnen

Hytta ligg i hyttefeltet ved Bøvertjønnen, like ved riksveg 55 over Sognefjellet. Dette er den største hytta på vel 50 m2, med to soverom og fire sengeplassar. Hems med plass for lausmadrasser. Hytta er brukt av oppsynet i sommarmånadene.

 






Heranosbua

Hytta ligg i Veodalen, like ved vegen til Glitterheim, ca. 7 km før grensa til nasjonalparken. Hytta er på ca. 40 m2, med to soverom og fire sengeplassar. Hytta er brukt av fegjetaren frå ca. 1. juli og til ca. 10 sept.

 



Grønbua

Hytta ligg i Veodalen, 150 meter frå vegen til Glitterheim, ca. 1 km frå grensa til nasjonalparken. Hytta er på ca. 30 m2, og har to rom. Det er tre sengeplassar.

  


  Grønbua , Veodalen










Langvassbua

Hytta ligg ved Langvatnet, ca. 2 timers gange frå Leirvassbu i retning mot Gjendebu. Hytta er ca. 25 m2. Det er to rom, men berre eitt rom er disponibelt. Her er tre sengeplassar. Fjellstyret har også robåt her som kan nyttast.

 



Storådalshytta

Hytta ligg i Storådalen, ca. 1,5 timers gange frå Gjendebu, ved råket til Leirvassbu. Hytta er vel 20 m2 og har berre eitt rom og vindfang. Her er to sengeplassar

 



Veslfjellbua

Hytta ligg ved Krossbu, like ved riksveg 55 over Sognefjellet.

Hytta er sameige med tamreinlaget, som disponerer den eine delen av hytta. Disp. areal er knapt 20 m2, og her er to senge-plassar.

 



Gjendebua

Hytta er nyleg oppført og vil bli disponert av beitelaget den tida det er beitedyr i fellesdrifta her.

  


  Steinbua i Memuru

  Denne er nyrestaurert, fullisolert med vedomn og bra utstyrt. Ca. 15 m2 innvendig med to sengeplassar og to lausmadrasser.

 





Opne steinbuer

I Veodalen er det tre steinbuer som er restaurerte slik at dei er brukbare nattelosji. Ved elva Bergenussa er det to buer, om lag 200 m frå vegen til Glitterheim, 2 km innanfor nasjonal-parkgrensa. Den tredje, Saubua, ligg innunder Saubuhaugen ved tråanlegget til tamreinlaget.

I Veslådalen, ca. ein times gange frå Gjendebu, ligg det ei steinbua på andre sida av elva enn turistråket går.

Øvst i Gravdalen, ca. 15 min. gange frå Leirvassbu, ligg det nok ei steinbu. Denne vart restaurert sommaren 2005. (Bildet.)