Det er sendt ut brev til alle med seter eller tilleggsjord i statsallmenningane i Lom med orienrering om seterforskrift, og om registrering av setre, kulturbeite og tilleggsjord. 
Forskrift om seter og tilleggsjord

Med bakgrunn i fjellova og forskrifter til denne, er det fjellstyret som forvaltar utvising og bruk av seter og tilleggsjord i statsallmenningen.  Statskog er høyringspart i sakene.

Etter rundskriv M-4/2009, ”Om forskrift om seter og tilleggsjord m.m. i statsallmenningane”, pliktar fjellstyret å føre jamnleg kontroll av om utviste setrer og tilleggsjord er i bruk. Slik kontroll skal skje minst kvart 10. år, og Statskog SF skal ha ein dokumentasjon på at dette er gjort for oppdatering av seterregisteret.

Vedlagt brevet fylgjer seterforskrifta, som ei orientering til alle med seter eller tilleggsjord i statsallmenningen.  Meir informasjon og utfyllande kommentarar til seterforskrifta kan de finne på desse  heimesidene, www.lom-fjellstyrene.no, www.fjellstyra.no og www.lovdata.no      

I tillegg til seterforskriftene vert det vist til § 22 i fjellova som omhandlar frifall av seter med tilliggjande kulturbeite, og frifall av tilleggsjord.  Dei fleste er klar over kva for reglar som gjeld for frifall av seter, men det synest vera mindre kjent at retten til tilleggsjord fell bort når denne i 5 år samanhangande ikkje har vore i bruk.  Vidare at bortleige av tilleggsjord ikkje vert rekna som at tilleggsjorda er i bruk frå den garden tilleggsjorda er utvist til.  Bortleige av tilleggsjord for eit tidsrom av 5 år eller lenger, tilseier at denne har falle i det fri.

For vel 10 år sidan gjorde fjellstyret ei registrering av dei enkelte festeforholda  på seter/kulturbeite og dyrkingsparsell i allmenningen. Fjellstyret vil no starte arbeidet med ei rullering av seterregisteret, og vil innhente ny informasjon frå den enkelte festar/retthavar om bruken av setra/tilleggsjorda. Kontroll ute vil bli utført av oppsynsmannskapet.  Arbeidet med slik kontroll vil foregå årleg etter ein rullerande plan.